Produktbilder i lyskasse

På eplaforumet er det ofte spørsmål om korleis ein kan ta gode produktbilder. Eg dreiv og tok litt bilder i går, og tenkte eg kunne vise min metode som baserar seg på ein høgst heimesnekra "lyskasse". Og når eg seier heimesnekra så snakkar eg pappeske og teip, heilt basic med andre ord, men det funkar for meg. Poenget med ein slik kasse er både å få fanga lyset og sendt det inn mot gjenstanden, og å gi ein nøytal, fin bakgrunn. Denne metoden passar om du skal ha bilder av ein gjenstand som ikkje er altfor stor, men har du plass kan du sjølvsagt lage lyskassa så stor som du vil.

Eg har rett og slett tatt ei pappeske, skåre vekk frontveggen og forsterka resten med pakketeip. Så har eg brukt offwhite kartong i A3-format som bakgrunn, eg har lagt arket langsmed bakveggen og underlaget med ein bue i overgangen, og festa godt med teip. På sideveggane har eg festa vanleg kvitt papir for å få mest mogleg lys reflektert inn mot produktet. Slik ser det ut:

Eg tar alltid med meg kassen ut i dagslys når eg skal ta bilder, skal du fotografere inne må du ha kunstig lys. Då er det vanskelig å få godt resultat utan dyrt spesialutstyr. Skjønt eg trur nok det skal la seg gjøre, men eg har ikkje kome så langt som til å begynne å eksperimentere med det. Kanskje i vinter når det er dårlig med dagslys?

Eg pleier å ta lys i lett overskya ver, så får du masse lys utan dei skarpe skyggane som sola gir. Er du velsigna med mykje sol kan du sjølvsagt finne ein stad i skyggen, men då får du ikkje like mykje lys inn på produktet. Her på Vestlandet er me ikkje overvettes plaga med fint ver, her handlar det meir om å springe ut og ta bilder mellom regnskurene...

Eg prøver å få kassen min litt opp i høgda for å få mest mulig lys, og best vinkel til sjølve fotograferinga. Her har eg plassert den oppå ei hylle utanfor huset, og sørga for at den opne veggen er vendt mot lyset.Bildet under er det som skal bli produktbildet, her er det heilt ubearbeida. Eksperimenter gjerne med å både gå tett på kassen, og å ha litt avstand og heller zoome inn. Då kan du få forskjellige dybdevirkningar.

Seinare når eg sit og redigerar bildene, er første steg beskjæring. Eg brukar nesten alltid kvadratiske bilder i eplabutikken min, for då unngår ein rare utsnitt på miniatyrbilder og i lister.

Neste steg er å lysne bildet. Eg er så heldig å ha photoshop, der brukar eg Image > Adjustments > Levels for å dra opp lysstyrka. Først drar eg opp dei kvite verdiane med pila heilt til høgre, så justerar eg midttonene opp eller ned for å gi bildet mest mulig korrekte fargar. Ingrid Riddervold har ei grundigare skildring av dette i bloggen sin. Om det blir litt svake skyggar på den kvite bakgrunnen så syns eg det er heilt ok, det kan gi litt meir liv til bildet.

Og så har eg bildet mitt! Då gjenstår det berre å krympe det til passe størrelse og legge det ut.

Ofte kan det vere fint å lage eit utsnitt eller eit nærbilde for å variere uttrykket litt, og fordi det kan bidra til å vekke interesse. Her har eg redigert bildet under som skildra ovanfor, men eg har gjort ei meir dramatisk beskjæring. Berre synd eg har klart å få snuten til dinosauren litt uskarp...

På denne måten får du produktbilder som har lys bakgrunn utan å vere for skrikande. Sjølv om eg syns det er veldig fint med bilder av gjenstander i eit miljø, syns eg det er vanskelig å få til i praksis. Med denne metoden føler eg at eg får framstilt tinga mine mest mulig riktig, og eg får eit einsarta uttrykk i butikken min. Når ein selger ting ein lagar på nettet trur eg bilda er det aller, aller viktigaste virkemiddelet. Som kjøpar hoppar i alle fall eg galant over grå og grumsete bilder, då føler eg meg ikkje sikker på kva det er eg eventuelt vil få. 

Eg veit at det fins ein del gratis programvare å fatt i på nettet som har noko av dei same funksjonane som dei eg nevnte over, men eg har ikkje noko erfaring desse. Eit kjapt googlesøk gir dette resultatet, så det bør vere mulig å få til eit bra resultat utan å investere i dyre programmar. Kanskje nokon kan anbefale eit eller anna?

Heile denne prosesen tar naturligvis mykje tid. Derfor har eg begynt med "masseproduksjon", riktignok i liten skala. Eg lagar alltid fleire like produkt slik at eg kan bruke bildene om igjen. Av ein gammel ullgenser kan eg kanskje få laga seks kaniner, og då syns eg det er greit å bruke litt tid på bildene så lenge dei kan brukast til alle sammen.

Vesker

I sommar fekk eg plutselig over meg at eg måtte sy vesker. For det første trengte eg ei sjølv, for det andre hadde eg lyst til å sy noko som var ferdig etter syinga - vanligvis syr eg jo mykje ulldyr som må stappast og broderast og handsyast etter sjølve syinga. Og sånt kan ein bli litt lei av innimellom.

Så vesker blei det, av ymse gardinar og gjenbruksstoff samt tweedaktige ullstoff frå frakkar og jakker plukka opp på loppis. Eg klarar aldri å motstå eit fint tweedstoff, så det har ein tendens til å hope seg opp litt. Første vekse ut var prototypen og den brukar eg nesten daglig, eg er veldig fornøyd med forma og størrelsen til dei dagane du ikkje har så mykje med deg at du treng sekk. Den er på grensa til å vere vel blomstrete, men eg syns det grå ullstoffet balanserar det heile:

Mens eg hadde blod på tann sydde eg to til, ei av ein stripete stoffrest frå Fretex:

Den neste varein knallfin blomstrete duk frå 70-talet tippar eg:

Det var gøy å sette sette sammen stoffer, knappar og fargar, og eg har jammen lyst til å lage fleire. Kanskje eg skal utvide til vesker også i eplabutikken?

Leiker på heimefronten

Eg skulle tømme minnekortet på kameraet, då dukka plutselig dette bildet opp. Jenta i huset har tydeligvis "lånt" kameraet for å forevige dokka og reven saman med ein av dei siste bukettane frå hagen i år. Reven var jo opprinnelig sydd til lillebroren, men han har aldri vore nevneverdig interessert så søstra annekterte den fort. Etterkvart skifta den visst kjønn også og gjekk frå cordfløyelbukse og tweedvest til kjole og perlekjede... Jaja, uansett må eg innrømme at det er godt å sjå at dei heimesydde leikene stadig er i bruk, og ikkje minst at dei held seg godt!

PS: Eg har så smått oppdatert Blåbærbutikken, håpar på meir ulldyrsying i løpet av hausten!

Mammaskjørt

Det har meldt seg eit behov for klede med plass til ein veksande mage. Ein del har eg jo frå før ettersom dette er tredje runde, men så er det jo alltid kjekt med litt nytt også. Eg ville ikkje legge all verdens tid og krefter ned i dette sidan energien ikkje er på topp for tida, men eit enkelt skjørt i A-fasong tenkte eg måtte vere greitt å få til. 

Kan hende det er fleire enn meg som er i same situasjon, så her kjem ei kjapp forklaring av framgangsmåten eg brukte. Det er gjort litt på slump, og måla er dei som passar meg, så du må ta dine eigne mål og tilpasse det slik du sjølv vil ha det. Du treng eit stykke fast stoff, litt avhengig av bredda på stoffet ditt så treng du 0,5-1 meter. Så må du har eit stykke elastisk stoff, bredt nok til å gå rundt magen og ca 30 cm langt. Eg brukte rett og slett delar av ei gamal T-skjorte.

Så skal du lage eit mønster. Ta mål rundt hoftene, rett under der magen går ut, legg til 5-10 cm for bevegelsesrom og del talet på fire. Eg var 105 cm rundt hoftene, økte opp til 110 og kom fram til ca 28 når eg delte på fire. Dette blir bredda på toppen av mønsterstykket. Bruk eit stort stykke papir og mål opp denne lengda inn frå kanten på papiret slik eg har gjort på bildet under, den øverste stipla linja.

Så skal du ta lengda. Mål frå same stad du målte rundt hoftene og ned så langt du vil at skjørtet skal vere. mitt er 50 cm langt og går til rett under kneet på meg. Merk av denne lengda på mønsteret. 

No må du merke av kor bredt skjørtet skal vere nede, eg ville ha ein typisk A.fasong og la på ca 12 cm på bredda oppe for å få det til, men her er det sjølvsagt rom for variasjonar. Merk av denne bredda slik eg har gjort med den stipla linja nede. Mi bredde her er altså 40 cm.

Så trekker du ein strek på skrå mellom enden på dei to stipla linjene for å få sida på mønsteret, og tegner ein svak buefasong på linningen og nederkanten på skjørtet for å få eit finare fall. 

Det mønsteret du no sit igjen med er ein kvartdel av det ferdige skjørtet, den loddrette linja til høgre skal vere midten. Brett stoffet ditt dobbelt og legg denne linja parallelt med brettekanten, legg til ca 1 cm sømrom rundt dei andre linjene og klipp ut, så har du forstykket på skjørtet. Gjenta for å få eit bakstykke. 

Legg dei to stykka rette mot rette og sy saman i sidene. 

Så skal du lage det elastiske linningen. Gå tilbake til hoftemålet ditt frå starten, og del det på 2. Dette blir bredda på linningstykka. Finn ut kor høg linning du vil ha (mitt er på ca 15 cm) og doble dette talet for å finne høgda. Eg klipte altså ut to stykker på ca 52x30 cm. Linningen skal vere litt meir ettersittande enn sjølve skjørtet, så bredda blir litt mindre. Som de ser så går det heilt fint å bruke ei litt stor t-skjorte til dette, men det er nok ein fordel om det er litt stretch igjen i stoffet!

Sy dei to stykka til linningen saman rette mot rette. Eg er så heldig å ha overlockmaskin, hvis du ikkje har det så går det heilt fint å bruke sikk sakk.

Brett/vreng linningen i to, vrange mot vrange, som på bildet under.

Snu skjørtedelen med retta ut, og tre linningen utanpå slik at dei to sårkantane møtest. Fest sammen men knappenålar. Sidan skjørtet er hakket vidare enn linningen må du strekke linningen litt for å fordele det jevnt utover. Sy dei to delane saman langs sårkantane rundt heile. Pass på å strekke litt i linningen mens du syr også. Igjen, bruk sikk sakk eller overlock, sømmen må nemlig vere elastisk ettersom stoffet er det.

Vreng linningen opp. Legg opp skjørtet nede, og så er du ferdig!

Eg fekk to linningar ut av ei t-skjorte, så eg sydde like godt to skjørt. Dette under her er litt kortare, går til rett over kneet, noko som med ein gong gir eit heilt anna uttrykk. Det går også an å lage det rettare for eit meir smalt skjørt, eller vidare nede for eit med meir sving i. Mange variasjonsmuligheter med andre ord! Gi meg gjerne ein lyd om du lagar eit slikt skjørt, det vil eg vwldig gjerne sjå.

Sommarbukser

Jøss, kven skulle tru det skulle bli så langt mellom innlegga her! Kva kan eg seie, fulltidsjobb og familieliv har gitt lite tid til anna denne våren. Men her for to veker sidan var det plutselig full sommar og ikkje vår lenger, og eg blei tatt på senga med tanke på minsten sin sommargarderobe. Eg kunne jo ikke sende guten i barnehagen med velourjoggedress i 25 graders varme, så her måtte symaskina svingast i gong. Når guten på toppen av det heile plutselig har blitt litt kresen i klessmaken var gode råd dyre. Heldigvis veit eg jo at alt som involverar kjøretøy og maskinar alltid er populært, og med dei fine bil-, fly-, tog- og helikopterstoffa var saken biff.

Eit veldig enkelt buksemønster med berre to delar vart forkorta til bermudashortslengde, og eg sydde like godt fire stk når eg først var i gong. Guten var storfornøyd, og buksene gjekk rett inn i sirkulasjon. Helikopterbuksa var sjølvsagt til vask når bildet blei tatt, men den er fin den også!

No er sommarvarmen borte vekk, og minsten er tilbake til parkdress og lue. Innimellom i alle fall. Men me satsar på at det kjem meir sommarver og at sommargarderoben får lufta seg igjen.

Samanbrettbart handlenett

For ei tid tilbake kome eg over denne linken på Pinterest, og sidan har den blitt liggande. Men her om dagen tok eg meg endeleg saman og laga meg eit slikt handlenett, det er ikkje så stort men veldig praktisk å ha med seg i veska når ein plutselig treng litt ekstra bærekapasitet. Når du er ferdig med det er det berre å brette det saman og feste strikkhempa rundt knappen, så tar det nesten ingen plass. 

Eg valte å bruke stoffa Allium og Bringebær. Eg visste jo at desse to var meint å høyre saman, men det var først etter eg hadde sydd saman nettet at eg skjønte for ein lekker kombinasjon det verkeleg er! Syns de ikkje? Neste gong skal eg lage eit som er større, kanskje med stoffa Grøn vår og Pære?

Fastelavnsris

Ekskusiv fastelavnspynt av Libertystoff

Neste helg allereie er det fastelavn, og i går var me ein liten tur i skogen for å klippe nokre bjørkegreiner til fastealvnsris. Me burde nok vore ute minst ei veke før om me skulle fått grøne spirar på kvistane, men så får det heller bli grønt litt på etterskudd i år. 

Me har jo ein liten, fargerik hønseflokk i hagen og i fjor hadde me samla opp fjør frå dei i ulike fargar som me brukte til å pynte riset. Men så var det det med å finne ting igjen frå eitt år til eit anna... Og no er det kaldt ute så hønene treng dei fjøra dei har. Då måtte me tenke alternativt for å få pynt på riset. Og det mest nærliggande for meg var jo sjølvsagt å tenke tekstil. Eg hadde nokre smale strimlar av eit nydelig Libertystoff ligande framme til fryd for auget, og tenkte at dette kunne eg vel bruke. Eg fann fram eit lite knippe fleire stoff i passeleg vårlege fargar, så lagde eg og fireåringen vår eigen pynt. Og me syns det blei vel så fint som den tradisjonelle fjørpynten! Her er ein liten steg-for-stegforklaring om andre vil gjøre som oss:

Riv 1-2 cm breie strimlar av stoffet

Klipp lengder på 8-10 cm

Brett dei i to og finn fram ståltråd, blomstertråd eller liknande

Legg stoffbitane saman som ein bukett og surr tråden rundt dei bretta endane

Fest på kvisten med ståltrådendane

Du kan variere kor stor og fyldig pynten blir etter kor lange remser du klipper og kor mange du surrar saman om gangen. Her har eg brukt fire remser i kvar "fjør", men kunne nok med fordel brukt eit par til.

Her er det ferdige resultatet, litt skrint er det men det hasta med å få tatt bilder før lyset forsvann. Me skal pynte meir i morgon!

Fredagsfavorittar frå Epla

Her er mine eplafavorittar denne fredagen Klikk på bildet under for linkar til butikkane og varene, du kan også finne andre sine fredagsfavorittar her.

Reven som lengta mot våren

Minstemann i huset fylte to år no i veka, og måtte sjølvsagt få seg eit ulldyr frå mammaen. Det vart ein rev, eg har hatt planar om å lage ein sånn lenge men dette var altså sparket som skulle til.

Eg har heimedag på fredagar, og i dag har eg og reven vore ute i skogen her bak huset og iscenesett eit lite eventyr. Har du lyst til å sjå? Klikk deg inn på bildet under!

Jula er ute, men ikkje juleputene

Så var me i gong med 2012, får håpe at det blir minst like bra som 2011 for oss alle! Forrige helg vart jula rydda ut av huset her, men enno heng det visst litt igjen. Av alle dagar i året var det på vesle julaftan eg fann ut at me måtte ha juleputer. Behovet var så akutt at symaskin og egna stoff måtte dras opp frå det iskalde syrommet i kjellaren, og stova vart igjen omgjort til midlertidig systove endå eg hadde lova dyrt og hellig at det ikkje skulle skje. Takk og lov for tålmodige mannfolk! 

Fem sofaputer, inkludert Monsemann (den finaste av dei alle)

Juleputer blei det i alle fall, heile fire stykker, sydd av ymse gjenbruksstoff eg har hatt liggande. Og mens eg var i gang sydde eg like godt matchande vimplar til opninga mellom stova og kjøkkenet, skjønt dei har eg visst ikkje bilde av. Eg er i alle fall godt nøgd, og så er dei ikkje så utprega julete at dei ikkje kan vere sofafyll ei stund til. Av og til er det så godt med sånne prosjekt som ikkje krever så mykje konsentrasjon og likevel gjer litt ut av seg. Eg gler meg allereie til å lage nye putetrekk for å ønske våren velkomen. Kanskje i slutten av februar?