For hand

Nye vegar

2010-10-19T19:41:00.000+02:00

Det har vore stille her den siste tida, og det er ein grunn til det, eg har nemlig opna butikk! Der sel eg miljøvennlege stoffer og papirvarer, og har også laga blogg til butikken. Eg kjem nok til å vere meir å finne der enn her framover. Velkommen innom!

Nye ulldyr!

2010-08-03T19:46:00.004+02:00

Endelig har eg fått sydd litt på det fine nye arbeidsrommet, og resultata ligg i butikken! Pingvinen er som nevnt siste tilskot til menageriet, han er ein staselig kar med flette på magen.

Eg syns også at denne lilla stegosauren blei fin, no må eg halde augene opne etter fleire lilla ullgensrar...

Babyteppe

2010-07-20T23:45:00.003+02:00

Endelig er pc'en heime igjen og me kan surfe på nokolunde vanleg vis igjen...
Eg har flytta inn i nytt syrom i kjellaren etter vekesvis med rydding og maling, og er no i gang med å sy nye ulldyr til eplabutikken. Elles har det ikkje vore mykje søm i sommar. Men eit lappeteppe til ei ny lita niese har det blitt. Familien har to gutar frå før, så eg hadde lyst til å lage noko riktig jentete utan å bli for "rosa". Teppet er laga av brukte stoffer, det einaste som er kjøpt nytt er bomullsvatten i midten som er noko eg hadde liggande frå tida før eg blei gjenbruksfiksert. I det eine hjørnet er det sydd fast ein liten hekleduk som babyen si oldemor har hekla. Ho lever diverre ikkje lengre, men ho er kjelde til mange gode minner og var ei av dei som alltid hadde opptil fleire handarbeid på gang. Eg er nøgd med resultatet, og veslejenta ser ut til å vere det også!

Just checking in

2010-07-03T12:09:00.003+02:00

Her er me i sommarmodus og dessutan har pcen krasja, dermed blir det lite blogging, lite surfing og lite lagt ut på Epla. Den gamle pcen som eg brukar no er ulideleg treig... Ikkje at eg egentlig har noko å legge ut for det er ikkje mykje sying som foregår for tida heller. Derimot held eg på å rydde eit kjellarrom som skal bli kontor og syrom! Sidan me flytta hit for to og eit halvt år sidan har det vore lagerplass for alt mulig brukbart og ubrukeleg, det har vore vinterlagringsplass for planter og det har vore oppalsrom for kyllingar. Med andre ord - fullt av rot, støv og jordsøl. Så det tar si tid å rydde og vaske, eg tar det i rykk og napp mens ungane søv. Håpar eg blir ferdig i løpet av neste veke!

I mellomtida låner eg bilder av Heidi frå passelig dose, ho er ein av dei som driv Galleri Branntårnet i sommar og ho har laga eit innlegg om bua der dei sel blant anna ulldyra mine! Her er eit nytt tilskot til menasjeriet; pingvin! Den kjem nok til å dukke opp i butikken i løpet av sommaren. Opprinneleg var det ein kunde som lurte på om eg kunne lage pingvinar, ho ville ha ein i gåve til ei lita jente som var så glad i sånne. Eg teikna og prøvde meg litt fram, og pingvin blei det! Eg elskar å lage nye mønster, har massevis av idear også, berre synd det er så lite tid til å gi dei liv...

Her er pingvinen passande nok plassert i lag med t-skjortene og visittkorta til Unni Strand, også dei med pingviner...

Dyrene i Afrika

2010-05-27T20:38:00.003+02:00

...er ein av favorittsongane til jenta i huset, den synger ho både titt og ofte. Også når ho inspiserar mora sitt arbeid no om dagane. Her går det nemlig i dyreproduksjon, dei fleste skal avgårde til Galleri Branntårnet i Risør for salg i sommar. Så eg har nok å gjøre.

Men ein må jo innom brukthandlane i ny og ne, seinast kom eg over denne perla. Eit lite brodert vertinneforkle i lin. Nydelig, synest eg, både fargar og former. Eg får ein viss 50-talsvibb av mønsteret, kan det stemme tru?

Solhattar

2010-04-21T17:58:00.003+02:00

Når sola tittar fram er det på tide å lage nye solhattar til ungane. Og med det var ei ny dille født så no blir det sydd solhattar opp og i mente. Eg hadde ikkje noko mønster så det måtte eg lage sjølv, utfordrande men veldig tilfredsstillande når ein får det på plass etter ein del tilpassing og finpussing. Desse små hattane er ein kjempefin måte å få brukt fine stoffbitar slik at dei kan bli vist fram i all si prakt... foreløpig har eg lagt ut tre skikkelig 70-talshattar på epla, så snart eg får tid hareg planar om å sy nokre meir romantiske og sarte. Og også nokre med meir grafiske trykk, stripar og sirklar. Moro!

Loppefunn

2010-04-13T10:59:00.004+02:00

I helga var det loppis igjen, eg var på plass fem minutt etter åpningstida kl. 9. ikkje verst når ein tar i betraktning at mann og barn og eg skulle stå opp, gjørast klare, matast og pakkast i bilen. Eg blei droppa av på loppemarknaden mens resten fòr på besøk til svigers sidan det var ganske nærmt. Så var det berre for meg å ringe når eg var ferdig for at den snille mannen skulle komme susande for å hente meg igjen.

Det var ein ok loppemarknad, men dei prisa seg jammen høyt. Likevel fekk eg med meg eit par ting, kuppet var ein handlepose full av snorer og band til ein femtilapp. Mesteparten var på spoler framleis, med prislapp, det må ha stamma frå ein butikk ein eller annan gong vil eg tru. Ein del er frå Trengereid fabrikker, som vart etablert i 1895. Varer frå Trengereid dukkar ofte opp på brukthandlar, eg syns logoen er så fin!

Elles kjøpte eg litt stoff i form av gardiner og sengetøy, men eg fann altså ikkje ein einaste ullgenser! Det var ganske uvanleg. Eg har jo i grunnen eit ganske stort lager, men er stadig på jakt etter fargar som ikkje er så vanlege på lammeullsfronten, gult og oransje for eksempel. Skulle gjerne hatt det for å lage fleire bananer og appelsiner. Jaja, dei to neste helgene er det nye sjansar!

Ein gammel ullgenser får nytt liv igjen

2010-04-07T16:00:00.002+02:00

No er det eit år sidan eg begynte for alvor å bruke gamle ullplagg til å lage nytt, og eg kan vel trygt seie at eg no har bygd meg opp eit bra lager med materialer etter ein del loppemarknader og brukthandelbesøk. Eg finn stadig nye bruksområder, her er noko eg sydde til minstemann i huset. Ein ulldress kan vere god og varm både i bilen eller i vogna, eller når han sit i bæresele på magen. Dette er ei stor genser som vart krympa i vaskemaskinen, den blei godt tova så dressen er ganske tjukk men likevel veldig god og mjuk. Eg brukte nederste del av erma til ermer på dressen, fiffig eller? Så måtte eg skøyte på litt nederst på beina sidan genseren ikkje var lang nok til å dekke heile lengda på dressen. Og rutemønsteret havna på baksida men eg bomma litt på mønsterrapporten... Har ikkje prøvd den så mykje endå sidan den fortsatt er litt stor, men snart håpar eg den kan bli flittig brukt.

Me brukar tøybleier på guten vår, og søstra også det første året hennar. Mange tenker vel at det er mykje pes med skylling og koking og slikt, men det treng ikkje vere slik. Tvert i mot er det overraskande lettvint! Det er eit vell av ulike løysingar der ute, det vanskelegaste med heile greia er egentlig å finne ut ka ein skal velje. Så langt brukar me ull som sperrelag, ullbukser som er behandla med lanolin held fuktigheita inne i bleia. Denne vesle ullbuksa er sydd av ein suprmjuk lammeullsgenser, eg har brukt ei favorittbukse me hadde frå før som mal og klipt og sydd på frihand. Den ser i allefall ok ut, no gjenstår det å sjå om den vil halde tett.

Blå knappar

2010-03-28T23:36:00.003+02:00

Fleire frå siste knappefunn, dei tre i midten er av glas, den vesle blomsterforma mulig perlemor, eller plast som dei andre. Eg likar spesielt godt dei turkisblå med kvite striper, dei gir meg litt 50-talsvibbar. Er det rart ein blir glad når ein kjem over slikt?

Knappar for dagen

2010-03-25T19:36:00.006+01:00

Eg likar knappar. Eg elskar dei faktisk. Andre her i huset vil seie at det grensar til sjukelig, men eg veit om fleire andre som også kan sitte og telle knappar ein regnversdag og vere såre fornøyd med det. Dattera mi på snart tre år tegnar til å bli ein slik, det varmar eit morshjerte. For ikkje så lenge sidan kom eg over ei korg full på ei av favorittbruktsjappene, og eg tilbrakte ein lykkeleg halvtime med å sortere meg gjennom dei mens minsten sov i vogna. Kom ut med kanskje 100 stk av dei finaste til 35 kroner, og følte meg direkte oppløfta! Mange av dei var av glas, både klart og farga, det kan kanskje tyde på at dei er gamle? Eg veit i grunnen veldig lite om datering av knappar, det er visst tid for å drive litt online research.

Klare glasknappar - legg merke til "vaffelhjerta" på den største! Dei fem mellomstore har også hjerter på seg, kjempefine.

Svarte glasknappar i ulike variantar

Fuglereir

2010-03-24T13:12:00.004+01:00

Jo nærmare våren kjem, jo større blir fascinasjonen for fuglar og egg. Kjem kjøttmeisen tilbake til fuglekassa i år? Når ser me første grågåsflokken på veg nordover? Skal ikkje svarttrosten snart begynne å synge? Eg fann denne oppskrifta på nettet og måtte berre prøve:

Påskeegg

2010-03-19T20:52:00.004+01:00

Eg likar påske. Då er det så godt som vår. Dessutan er egget sentral i påska, og eg er svak for alt som har med egg og fuglar å gjøre. Dei seks hønene i hagen vår har begynt å verpe igjen, og egga er rett og slett nydelege.

Eg har etterkvart ganske mykje stoff liggande, det samlar seg opp etter eit utal besøk på loppemarknader og brukthandlar. Gardinar, dukar, sengetøy, klede, massevis av fine fargar og trykk på småbitar og større stykker. I fjor på denne tida tenkte eg at eg skulle sy påskeegg neste år, etter å ha sett det ein aller annan stad på nettet. Og det eg innser no er at desse små egga er ein perfekt måte å bruke alle dei fine stoffa slik at dei kjem til syne i staden for å ligge i ei mørk skuffe.

Eg ser også at eg lar meg inspirere av egga frå hønsehuset - det går mykje i dei same duse, sarte fargane. Det er ein litt skarp gul der som skil seg ut, eg har faktisk veldig lite gult i stofflageret mitt men syns nesten eg måtte ha med noko sidan det er påske me snakkar om.

Når eg først sette i gang så klarte eg nesten ikkje å slutte, det var så mange stoff eg ville bruke og så tilfredsstillande å finne gode kombinasjonar. Så det blei ein del egg. Nokre av dei er til sals i Blåbærbutikken.

Roser i håret

2010-03-15T20:56:00.003+01:00

Eg har leikt meg med småbitar av ullfilten min og laga søt hårpynt for småjenter - kanskje store jenter også? Eg er fornøyd med resultatet sjølv om det tok tid både å klippe og sy. Men det er jo fine smågåver, om eg skal seie det sjølv!

Loppemarknadstid igjen!

2010-03-11T13:24:00.004+01:00

Loppesesongen er i gang igjen, og sist lørdag fekk eg endeleg prøve meg igjen. Med ammebarn i heimen måtte det planleggjast godt, bussrutene vart studert nøye for å finne ut korleis eg skulle komme meg kjappast mulig frå ein ende av byen til ein annan og tilbake så eg slapp å ha meg meg unge og vogn på skattejakt. Det gjekk på under tre timar og guten sov heile tida, så det kan seiast å vere vellukka! Det var ikkje den beste loppemarknaden eg har vore på, men eg kom jo heim med litt likevel. Her er eit utval:

Fine blåblomstra bomullsstoff, begge er dokkesengetøy og virkar ganske gamle men i god stand

Eit par broderte dukar, ein del flekkar på dei men dei kan klippast opp og brukast til andre ting

Eit putetrekk med klassiske retroblomar

Ein bunke lammeullsgensrar som skal bli mjuke dyr

Ein knallraud rund duk

Dette som eg trudde var ein slik sak som ein kan nøste opp garn med, men eg innser no at det kanskje er for å lage slike vevspoler. Nokon som veit?

Eit par nye

2010-03-10T19:24:00.006+01:00

Stegosauren er jo ein gamal kjenning, det var det første dyret eg tegna sjølv. Moro å kunne bruke detaljar av andre stoff syns eg, og ein ypperleg måte å få fram fine småbitar. Ein oransje ein er klipt og klar for symaskina, men eg er ikkje heilt fornøyd med kontraststoffet så eg ventar litt og ser om det dukkar opp noko anna.

Haren/kaninen kom til med tanke på påske, ei høgtid eg set stor pris på. Eg trur det må vere at med påska kjem våren, alt er lysare og lettare og det blir hagetid igjen. I år blir det nok spesielt bra etter denne lange, lange vinteren! Eg har planar om å lage fleire variantar av denne haren, i ulike material og fasongar. Har ein med bein på tegnebrettet akkurat no, pluss at denne liggande skal få eit par småjusteringar. Den ser litt framtung ut på bildet, så eg skal fylle ut brystpartiet ein smule i alle fall.

Eg har problem med å få fram spesielt grønne nyansar på bilder, dette stoffet er ikkje berre grått, det har grønne og blå sjatteringar som står veldig fint til dei rosa øyrene. Eg må visst få meir konsulenthjelp frå familiefotografen. Eg er veldig godt fornøyd med linjene i haren, syns den er ganske riktig på eit eller anna vis sjølv om den er stilisert.

Søtsaker

2010-03-06T17:02:00.006+01:00

Vel og bra med sunn frukt og grønnsaker av ullfilt, men ein skal jo ha litt kos også... Også er det jo så moro å pynte med perler og blomar! Slikt kan det fort bli muffins av.

Frukt og grønt

2010-03-06T16:52:00.005+01:00

Heime hos oss er det populært med kjøkkenleik - her er eit utall dokker og bamser som skal matast, og av og til blir det litt på oss vaksne også. Difor kom eg på tanken om å lage leikemat, og valte sjølvsagt å bruke same materialer som eg brukar til dei mjuke dyra - ull. Her er utvalet så langt:

Eple og pære

Banan og appelsin

Jordbær

Agurk og tomat

Eg har planar om meir - gulrot, paprika, potet og så vidare. Eg må berre få tak i ullplagg eg kan tove som har dei rette fargane! Gule og oransje lammeullsgensrar er sjeldne å sjå på bruktmarknaden, diverre.

Nye dyr

2010-03-06T16:40:00.010+01:00

Krokodillen er heilt og holdent min eigen konstruksjon, isbjørnen tar utgangspunkt i eit mønster frå Karin Neuschütz men eg har endra det ganske radikalt. Begge to ligg i butikken.

Favorittar i blått og kvitt

2009-12-04T10:13:00.005+01:00

Det er utrulig mykje fint å finne på Epla.no, her er nokre av mine favorittar akkurat i dag:

Bilda er lånte frå dei ulike nettbutikkane:
Fugleegghalskjede frå marieflyfly
Porselensknappar frå Rageform
Gammelt linhåndkle med nytt trykk frå STRAND
Majakjole med sløyfer frå Sting & Ting

Dyra mine på Epla.no

2009-11-27T10:30:00.008+01:00

Eg har hatt det travelt for tida, det vil seie så travelt som ein kan ha det når ein er sjukmeldt og ute av stand til å bevege seg rundt som normalt pga bekkenløsning... No er det berre sju veker igjen til termin og då blir alt så mykje betre, håpar eg.

Men tilbake til det travle; noko må eg jo finne på her eg ligg på sofaen, og det har blitt ein heil del dyr sidan sist. Det å teikne nye mønster er akkurat passe kreativ utfordring for tida, fulgt av korte ekskursjonar til symaskina for å sy dei saman. Så tilbake til sofaen for å stappe, sy og brodere. Eg er rimelig hekta, og det blir nok ein del slike under juletrea til småungane i slekta i år. Men likevel er det mange fleire enn eg treng, så når eg hørte om Epla tidlegare i månaden fann eg ut eg skulle hive meg med. Så no er dyra å finne her! Mykje fint på Epla, høgst variert utval og ein god blanding av seriøs design og det meir heimespøta. Håpar det går bra for konseptet og at mange oppdagar gleda ved å kjøpe handlaga. Sjølv har eg også handla litt på Etsy tidlegare som er ufattelig stort, der kan ein finne det mest utrulige. Veldig bra at folka bak Epla har tatt initiativet til ein norsk variant!

Her er eit utval av dei nye dyra eg har laga, klikk på bilda for større utgåve:

Og eg har heile tida nye på teikneblokka, no er eg snart klar med min egen isbjørnvariant, ei krokodille og ein hest. Eg lagar dyra i ny ullfilt, eller ullfilt som eg lagar sjlølv av gamle lammeullsplagg som blir vaska og tova i maskin. Så har eg bestilt vaska, karda ull frå HIFA som eg brukar til stapping. Og eit og anna loppisfunn til detaljar. Med andre ord, gjenbruk og miljøvennlege tekstilar - akkurat slik eg likar det!

Fleire dyr

2009-11-04T19:47:00.006+01:00

Gris og isbjørn - isbjørnen er laga for lenge sidan i ullfilt, ansiktet er brodert på med svart ullgarn. Øyra er sydde på for hand, no har den blitt herja med eit halvår og det har holdt fint. Godt å få teste ut desse tinga! Grisen laga eg her om dagen, av bomullsfløyel frå eit loppisputetrekk. Det var noko herk å sy, gjer det ikkje igjen! eg kom heile tida skeivt ut, og det har veldig lett for å rakne i kantane. Lurar på om den bør få seg ein munn?

Elefant

2009-11-03T10:12:00.004+01:00

Boka "Sy myke dyr" av Karin Neuschütz er heilt fantastisk, og no har eg, som ho oppfordrar til, begynt å eksperimentere med mine eigne mønster. For tida prøver eg ut ein serie på tre dinosaurar, men dei er ikkje klare til å visast enno. Eg nøyer meg med denne elefanten sydd i blå ullfilt, ei bursdagsgåve til ein treåring. Ullfilt er eit utrulig takknemlig materiale å sy i, og dyra blir veldig gode å halde i. Som eg skulle ønske eg hadde eit skikkelig kamera som kunne få ting til å framstå i eit litt betre lys!

To kjolar

2009-11-03T10:02:00.005+01:00

Eit par kjolar sydd den siste tida; den eine utelukkande av gamle dukar, den andre av gamle klede.

På grunn av ei uheldig oppklipping av skjørtdelen måtte det bli eit litt rart legg midt på denne, men det var i grunnen ikkje så verst. Eg har sydd den ut frå mitt eige hovud, men livet er litt stort for ein toåring. Neste gang lagar eg det litt smalare og med mindre armhol. Den er også litt kort, men er tenkt meir som ein tunika utanpå bukse. Eg ser den kunne vore stroke betre på bildet...

Denne er sydd til ei jente som fyller eitt år i desse dagar, det grøne stoffet kjem frå ein kjole eg ein gong fekk av mora hennar for å klippe opp og bruke til noko, då syns eg det var passande å gi den tilbake i denne forma! Det brune prikkete stoffet er frå ei skjorte. Begge er viskosestoff, og det var ikkje så moro å sy i... men no har eg prøvd det også og er i grunnen ganske fornøyd med resultatet.

Hyperbolisk

2009-10-29T11:09:00.002+01:00

Om korallrev, hekling og matematisk teori på høgt plan... Matematikeren Margaret Wertheim fortel om prosjektet der ho og søstra, og etter kvart mange fleire, heklar eit korallrev og slik brukar eit århundregamalt handverk for å illustrere geometriske idear ein trudde ikkje kunne illustrerast. Vel verdt å bruke eit kvarter på å sjå denne videoen!
Les meir om Werthheim her.

Loppefunn

2009-10-20T13:01:00.005+02:00

Eg har fått med meg eit par loppemarknadet i haust, trass i veksande mage og påfølgande dårlig gangevne... Her er eit par av funna mine.

Ein pose full av knappar

Nokre treleiker

Metervis med sartrosa band

Nokre handbroderte lindukar

Vevde lindukar - eg er veldig svak for slike, men er usikker på kva periode dei var populære. Tenker mellom 50- og 70-talet, tru om det kan stemme?

Barnetunika

2009-10-19T13:37:00.003+02:00

Dette mønsteret er frå Ottobre Design nr. 6/2008, eg har brukt ei stripete bomullsgardin frå Fretex og i halsopningen ein liten bit av ein blomstrete duk kjøpt på loppemarknad. Syns det blei ein fin kombinasjon sjølv, men jentungen nektar å ta den på seg. Kva skal ein gjere med sånt?

Elvirakjole

2009-10-19T13:25:00.003+02:00

Dette mønsteret fann eg på Ravelry, ei gullgruve for strikkarar. Eg hadde kjøpt tre nøster alpakka på salg i denne litt kalde rosa fargen og lurte på kva eg skulle bruke dei til. Med ei toårig jente i hus var det ikkje noko meir å lure på då Elvira dukka opp, og no funderar eg på vaksenversjonen til meg sjølv... men det blir kanskje litt i meste laget. Både eg og jenta er i alle fall veldig godt nøgde med kjolen, og den kjem nok til å passe som tunika i mange år framover.

Kjapp gåve til ei snill tante

2009-10-19T13:19:00.004+02:00

Det har blitt ein del slike korger i det siste, dei er utrulig kjappe og greie å sy. Perfekt når du plutselig treng ei gåve. Forstoffet er bomullsgardin frå Fretex, det øverste blåmønstra er ein stoffrest, det nederste blåmønstra er eit Laura Ashleystoff frå loppemarknad. Hempene er frå ein svær rull med band som også er kjøpt på loppis. Huset er snart fylt opp med gamle stoff og syutstyr...

Veske

2009-09-25T22:09:00.003+02:00

Ja, så har det gått frå april til september utan eit einaste innlegg her. I sommarhalvåret er me mest ute i hagen, og blogging blir ikkje prioritert. Men eg har vore innom nokre loppemarknader og bruktbutikkar likevel, skaffa ein del meter gjenbruksstoff og jammen har eg ikkje sydd litt også. No er hausten her med mørke kveldar og regntunge dagar, då spørs det om ikkje produksjonen både ved symaskina og i bloggen tar seg opp ein smule.

Denne veska, The Margaret Bag, sydde eg i mai. Utsida er ei blomstrete bomullsgardin frå Fretex (meir svart enn det som visast på bilda) og foret er av ei lingardin funne på loppis. Knappen trur eg også kjem frå Fretex. Eg brukte ikkje nokon form for avstiving innvendig, eg syns det er heilt ok at den er litt laus i fisken. Derimot er eg ikkje heilt nøgd med fasongen, ikkje lang nok etter min smak. Trur eg må lage ei til og moderere mønsteret litt.

I morgon er det nytt loppemarknad, eg gler meg voldsomt!

Flower Power

2009-04-09T22:28:00.002+02:00

Eg har egentlig aldri hamna på dette 70-tals retrokjøret, kan styre meg for bråkete mønster i brunt og oransje... Men eg klarte ikkje stå imot desse her, skal nok klare å få brukt dei til noko tenker eg.

Den blå er ein duk kjøpt på loppemarknad, den kan vel vere 200 x 150 cm.

Det grønne er eit putetrekk eg fann på loftet i barndomsheimen min, og det rosa ei gardin frå Fretex. Heftige saker!

Reveraudt

2009-03-23T21:59:00.003+01:00

Dette ullstoffet fann eg på... Fretex, min favorittbutikk! Det er omlag ein meter, 140 cm bredt. Eg likar egentlig best baksida som er einsfarga rustraud, rutemønsteret på framsida kan eg styre meg for. Eg hadde tenkt å sy eit skjørt av det, før eg innsåg at det er perfekt til raudrevar (mønster frå same bok som terrieren). Eg har vel egentlig allereie sydd ein rev, men den er eg ikkje fornøgd med så eg må nok prøve meg på nytt.

Hus til strikkepinnene

2009-03-23T21:45:00.006+01:00

Eg laga eit par slike strikkepinneetui til å gi vekk til jul, no var turen endeleg komen til meg sjølv. Eg brukte lingardin til utsida og storblomstrete gardin til innsida, begge frå Fretex. Eg syns sjølv det blei ein bra kombinasjon, den litt rå naturfarga linen dempar blomemønsteret akkurat passelig. Spørs om ikkje eg må lage ei veske med dei same stoffa.

Tweedterrier

2009-03-20T20:37:00.005+01:00

Eg hadde ei gamal tweedbukse som eg likte veldig godt, og den blei tilsvarande mykje brukt. Tilslutt var den altfor sliten og nuppete, og eg måtte tenke nytt. Innsida av stoffet var stort sett like fint, og det slo meg at det måtte vere perfekt for ein terrier!

Det er nok sånn at mi gjenforening med symaskin og strikkepinnar heng tett saman med at eg fekk barn for snart to år sidan. Mykje av det eg lagar er til dotter mi eller andre små i nærleiken. Nyleg kom eg over boka Sy myke dyr av Karin Neuschütz og då var det gjort; no er eg hekta på små pusekattar, revar, kaninar og esel. Boka er full av lettfattelege mønster til relativt naturtro fine tøydyr, her er alt frå røyskatt til sjiraff til selunge. Du kan lage eit heilt fjøs også om du vil; kyr (med jur!), kalvar, hestar, esel, grisar og grisungar. No har eg altså begynt med ein terrier, og eg kjenner på meg at det blir fleire snart...

Ugle

2009-03-10T09:36:00.005+01:00

Desse uglene er kjappe å sy, og fine smågåver til ungar som er besøk. Dei gjorde seg også bra i fastelavensriset, her i huset vart det ein liten ugleskog... Oppskrift fins her. Det blå linstoffet er ei gamal bukse som blei for liten, og det mønstra stoffet på magen er ein liten rest. Ugla er kanskje 7-8 cm høg.

Vottar

2009-03-10T09:31:00.002+01:00

Eg strikka vottar til jenta mi i vinter, det var noko ullgarn eg har hatt liggande i åresvis så eg veit ikkje namnet på det. Vottane blei tova i vaskemaskin og er tette og gode. Problemet er at dei er i stivaste laget når ein skal kle på ei jente på snart to år tidleg om morgonen, og skal prøve å stappe vottane innafor eit trongt regnjakkeerme...

Strikketøymappe

2009-03-10T09:26:00.005+01:00

Denne er grei å ha strikketøyet i, både heime og når ein skal på tur. Min er litt i minste laget, eg trur eg må sy meg ein som er større også. Eg brukte denne oppskrifta, fleire her. Min er ikkje fora, eg må prøve å fundere fram ein måte å gjøre det på for det ville nok vere finare.

Tøykorger

2009-03-10T08:57:00.000+01:00

Desse har eg laga i ulike storleikar og gitt vekk i julegåve. Dei kan brukast til nøtter, til brødkorg, til oppbevaring av likt og ulikt. Eg har ei ved sidan av symaskina når eg syr, der samlar eg opp trådrestar og rusk som elles alltid hamnar på golvet. Oppskriftar på ulike variantar finst her.

Gardinar frå Fretex

2009-03-07T22:50:00.000+01:00

Gardinstativet på Fretex er ein ypperleg plass å finne billig stoff. Som regel kostar det mellom 20 og 50 kroner for eit gardinfag, og det er jo ofte fleire meter. Her er eit (noko blomstrete) utval av det eg har funne. Frå venstre:

3 gardinfag blomstrete, tynn bomull, bredde 140 cm, totalt ca 6 meter
Metervare bomull, 120 cm brei, ca 1 meter
Gardinfag bomull/lin, Åhlens, ca 2 meter

Dei to småblomstra skal eg blant anna bruke til bunting (kva heiter det på norsk?) som kan henge ute i hagen når me har ting å feire i heimen. Har ein del andre stoff som skal brukast til det også, så det blir riktig så fargerikt og fint.

Og her er det blomstrete så det held... Men når ein er så glad i blomar som meg så er det vanskeleg å la vere. Fine detaljar i desse botanikkinspirerte illustrasjonane, her er roser, peoner, tulipanar, rhododendron, nellikar og meir til. Eg kjøpte tre fag, godt over ni meter tilsaman. Gudane veit kva eg skal bruke det til utan at det tippar over og blir for mykje av det gode. Eg finn vel på noko, tenker eg.

Så over på det enkle; eg likte godt teksturen på denne gardina, litt vaffelstoffaktig. Kan bli ein fin bluse? Eller ein heil haug kjøkkenhanddukar? Har ca to meter av denne.

Loppemarknad

2009-03-07T22:27:00.000+01:00

I dag var det loppis på Rothaugen Skule, eg kjøpte ein heil del stoffar for ein billig penge. Her er nokre av dei. Frå venstre:
Lingardin (Ikea) omlag 3 meter
Duk, bomull, Mayfair Julia (?), ca 120 x 120 cm
Metervare bomull, gammelrosa ruter 140 cm brei, 1,5 meter
Metervare bomull, Laura Ashley, 120 cm brei, 1,7 meter

Fint og søtt. På Laura Ashley-stoffet hang faktisk den opprinnelege prislappen på; 374,-. Eg betalte 60,- for alle desse fire pluss to til som er til vask. Bra kjøp!